Mënyra e Përgatitjes
Frutat e manaferrave të pjekura mirë fermentohen në fuçi lisi për një periudhë jo më shumë se 2 deri në 3 javë, në varësi të temperaturës së ambientit dhe përmbajtjes së sheqerit të frutave. Sapo alkooli fillon të lëshojë aromën e manaferrave dhe fermentimi ngadalësohet, lëngu distilohet në enë bakri të nxehura nga zjarri i druve. Rakia e manaferrave prodhohet në fund të gushtit dhe fillim
të shtatorit. Tradicionalisht konsiderohet pije për burra dhe ata gjithmonë kanë qenë të përfshirë në prodhimin e rakisë. Rakia e manaferrës është prodhuar ndër shekuj në zonat malore të
Veriut të Shqipërisë. Rakia është pija tradicionale e Ballkanit, dhe ky version i veçantë prodhohet ekskluzivisht nga manaferra të egra të mbledhura kryesisht në zona mbi 800 metra mbi nivelin e detit.
Manaferrat janë ndër frutat e egra të pyllit që përfaqësojnë dukshëm gastronominë e komuniteteve malore në veri të Shqipërisë, dhe vendasit punojnë shumë për të ruajtur këtë traditë.
Manaferrat rriten në formë të egër në të gjithë Shqipërinë, por në jug të vendit ky frut nuk është përdorur tradicionalisht për të bërë raki. Sidoqoftë, në 30 vitet e fundit, prodhimi i rakisë së manaferrave ka filluar të përhapet në jug të Shqipërisë. Rakia e manaferrës mund të jetë pangjyrë ose e verdhë kur vjetërohet në fuçi druri. Ka një aromë të jashtëzakonshme, pak të ëmbël dhe është shumë e këndshme për t’u pirë.
Historia e Produktit
Rakia e manaferrave është një pije me një histori të lashtë, dhe përdoret për t’u konsumuar vetëm nga burrat. Gratë e vetme që lejoheshin ta pinin atë ishin burrneshat (virgjëresha të betuara shqiptare). Rakia përdorej dhe si pije kurative për të stimuluar qarkullimin e gjakut dhe për t’u zgjuar/kthjelluar (pas një nate pirjeje, një gllënjkë me fund pihej në mëngjes). Për shkak se rrushi nuk rritet në malet e Veriut të Shqipërisë, banorët e këtij rajoni nuk e kanë traditën e prodhimit dhe konsumimit të rakisë së rrushit; përkundrazi, ata kanë përdorur gjithmonë fruta pylli për të prodhuar pije. Manaferrat e egra që piqen mirë dhe arrijnë një përmbajtje të lartë sheqeri mund të prodhojnë raki të një cilësie shumë të lartë. Rakia e manaferrave shërbehej gjithmonë në dasma dhe festime të tjera familjare, si dhe gjatë mbledhjes për burra në sheshet e fshatit (gjithnjë ishte dikush me një shishe raki në xhep, dhe kur burrat e fshatit mblidheshin për diskutime, e kalonin
atë përreth tryezës). Rakia e manaferrave është prodhuar historikisht në nivel familjar. Prodhimi në nivel tregtar filloi vetëm në 20 vitet e fundit në disa distileri të Kukësit. Këto kompani shesin përmes zinxhirëve të supermarketeve në të gjithë Shqipërinë. Sipas vendasve, shija e rakisë komerciale të manaferrave ndryshon shumë nga versioni artizanal.
